طرح البيوت
----
ع الناصيه
الشارع اللي حبني و كرهته من قلبي
لسه عافـّه عليه البيوت
و البيوت سافـّه البشر
أحلام كتييييير
و الحزن عارف جدوله نفر، نفر
****
جمب بيتنا
جمب البقاله الشكك
مدنه و خرابه و فرن
أم ابراهيم برطمت : راجع منين الفجر يا فاجر ؟
" ألله أكبر ! "
إشتريت رغيفين.. يمكن أقوم الصبح
****
الدور الأول
قصّوا ضفاير مروه لما شبّـكت إيدها ف إدين ابن الجيران الصبح
بالليل...
شافوها بتغتصب و فـرقوا الشربات
****
الدور التاني
فاتن بتدعك ضهر جوزها و يضحكوا
" ملحوظه "
ما خلفوش لسه
****
الدور التالت
الراديو مش علي كيف ام جابر
كحة الراجل قلق
دلوقتي يتخانقوا علي المصروف و يناموا
****
شقـتنـا
أمي سجادة صلا
مقدرش انجسها بعذابي
كل الكباير ع الورق
يا رب انام !
No comments:
Post a Comment